Logic List Mailing Archive
Associate Professorship in Philosophy of Mind, Bergen (Norway), Deadline: 23 Feb 2013
Universitetet i Bergen
FOF - Institutt for filosofi og førstesemester
Universitetet i Bergen (UiB) er eit internasjonalt anerkjent
forskingsuniversitet med over 14 000 studentar og vel 3500 tilsette ved seks
fakultet. Vi held til midt i hjartet av Bergen og har røter tilbake til
grunnlegginga av Bergens Museum i 1825. Det viktigaste bidraget vårt til
samfunnet er framifrå grunnforsking og utdanning med ei stor fagleg breidd.
Førsteamanuensis i filosofi (sinnsfilosofi eller språkfilosofi)
Ved Institutt for filosofi og førstesemesterstudium er det ledig fast stilling
som førsteamanuensis i sinnsfilosofi eller språkfilosofi frå 01.08.2013.
Kvalifikasjonskrav
Søkjarar må ha generell forskingskompetanse i filosofi med norsk doktorgrad
eller tilsvarande. Dei må ha forskingskompetanse innan sinnfilosofi eller
språkfilosofi, i tillegg er det ønskjeleg med spesialkompetanse i ytterlegare
ein filosofisk disiplin.
Aktuelle søkjarar må vere aktive forskarar med publikasjonar på høgt
internasjonalt nivå.
Dei må ha tilstrekkeleg brei fagleg kompetanse til å kunne undervise og
rettleie innanfor fleire ulike emne på ulike fagtrinn og også innanfor område
der dei ikkje har spesialkompetanse.
Evne til og erfaring frå fagleg miljøbygging, kontaktskapande verksemd og
etablering av forskarnettverk både lokalt, nasjonalt og internasjonalt, samt
evne til og erfaring frå innhenting av ekstern finansiering vil bli vektlagt.
Den som vert tilsett, må ha pedagogisk basisutdanning. Søkjarar som ikkje
fyller dette kravet ved tilsetjing, får tilbod om opplæring og må dokumentere
at utdanninga er fullført innan eitt år etter dato for tilsetjing. Fristen er
to år for den som ved tilsetjing ikkje meistrer eit skandinavisk språk.
Om stillinga
Undervisningsspråket er norsk. Det blir kravd at den som vert tilsett kan
undervise på norsk eller eit anna skandinavisk språk seinast innan to år etter
tilsetjing. Den tilsette vil få tilbod om norskkurs i desse høva.
Tilsetjing i stillinga krev at ein har sin daglege arbeidsplass ved
Universitetet i Bergen, og følgjer dei retningslinene som til kvar tid gjeld
for stillinga.
Delar av undervisningsplikta vil omfatte undervisning ved examen philosophicum.
Løn
Løn etter lønssteg 57 (kode 1011/LR24) i statens regulativ, for tida kr. 468
400 per år. Vidare opprykk skjer etter tenesteansiennitet i stillinga. For
særskilt kvalifiserte søkjarar kan det verte aktuelt å vurdere høgare løn. Det
vert trekt 2 % pensjonsinnskot til Statens pensjonskasse.
Andre opplysningar
Utfyllande opplysningar om stillinga kan ein få ved å vende seg til
instituttstyrar Reidar K. Lie på telefon 55 58 94 37 eller e-post
Reidar.Lie@fof.uib.no.
Kvinner vert spesielt oppmoda om å søkje. Dersom dei sakkunnige finn at fleire
søkjarar har tilnærma like kvalifikasjonar, vil reglane om kjønnskvotering i
Personalreglementet for vitskaplege stillingar verte følgde.
Den statlege arbeidsstyrken skal i størst mogleg grad spegle mangfaldet i
befolkninga. Det er difor eit personalpolitisk mål å få ei balansert alders- og
kjønnssamansetjing og å rekruttere personar med innvandrarbakgrunn. Personar
med innvandrarbakgrunn vert oppmoda om å søkje stillinga.
Universitetet i Bergen nyttar prinsippet om meirinnsyn ved tilsetjing i
vitskaplege stillingar. Opplysningar om søkjaren kan verte gjort offentlege
sjølv om søkjaren har oppmoda om å ikkje bli ført på søkjarlista. Dersom
oppmodinga ikkje blir teken til følgje skal søkjaren varslast om dette.
Slik søkjer du stillinga
Søknad skal sendast elektronisk via link på denne sida ?SØK PÅ JOBBEN?.
Søknaden skal innehalde ei kort utgreiing om søkjaren sine undervisnings- og
forskingsinteresser og motivasjonen for å søkje stillinga.
Dette må følgje søknaden:
Søknadsbrev
Samandrag av ph.d.-avhandlinga, inntil 3 sider
Skanna versjon av originale eller attesterte kopiar av alle vitnemål frå
universitet/høgskular
Kommentert publikasjonsliste
Namn og kontaktinformasjon på tre referansepersonar
Dokumentasjon av og informasjon om pedagogisk innsats og kvalifikasjonar
Vedlegga kan vere i Word- eller pdf-format.
Merk: Det skal sendast inntil 5 vitskaplege publikasjonar eller upubliserte
manuskript (inkl. doktoravhandlinga), med liste over desse (i alt 3 eksemplar,
ferdig sortert i 3 bunkar) til: Universitetet i Bergen, Institutt for filosofi
og førstesemesterstudium, Postboks 7805, 5020 Bergen.
Søkjarar må gje opp dei arbeida eller delar av arbeida som det skal leggjast
særleg vekt på ved vurderinga.
Aktuelle kandidatar vil bli kalla inn til prøveførelesing og intervju.
Søknadsfrist: 23.02.2013
Søknaden skal merkast: 13/541